لطيفة "بالخليجي"

غلاف الألبوم روعة صج بدع مهند النعيمي بالغلاف، طبعاً الصورة اللي فوق أنا صورتها أول ما نزل الألبوم في الكويت عشان أبين هالشي في تغطية لطيفة أونلاين لطيفة بعد ما شافت الصورة دزتلي مسج قالتلي "رائعة" جان يصير ويهي طماطة :؛P

مع أني سمعت معظم أغاني الألبوم في شهر يونيو 2009 لما زارت لطيفة الكويت، و في أغاني وايد حبيتهم لما سمعتهم (مثل زد على نارك حطب) بس ما نزلوا لأن لطيفة حبت تعيد المكساج و ما كان في وقت...بس بصراحة كنت متخوف من أن الألبوم بيمر مرور.

نزل الألبوم و سمعته و من أول مرة حبيت فيه أغنية "كل واحد"، انا دايماً ما يعجبني أي ألبوم لما أسمعه حتى لو كان "للجني الأزرق" و عشان جذيه ظليت أسمعه أكثر و أكثر عشان ما حبيت أحكم من أول شي.

عجبني الدمج بين ستايل أغاني المغرب العربي مع الخليجي و أتوقع هالشي أول مرة يصير، لطيفة نوعت بستايلات الأغاني و الإيقاعات في الألبوم...نزلت خليجي كلاسيكي و خليجي شعبي...بس اللي ما حبيته طريقة نطقها للهجة الخليجية، في الآخر مافي فنان غير خليجي أتقن الخليجية 100% غير ديانا حداد و في فنانين ثانين تحسن نطقهم مع الوقت مثل أصالة أول ما غنت خليجي "أسمع صدى صوتك" وين كانت و الحين وين صارت.

عموماً، أنا ما توقعت الألبوم بيكون حلو جذيه خصوصاً إن أغلب الناس اللي اشتغلوا فيه مو معروفين و تسجل في قطر و مافي فنانين خليجيين يسجلون البوماتهم في قطر بس أتوقع بعد هالألبوم ناس وايد راح تروح قطر و تتعامل مع فنانينهم، الألبوم فيه أغاني حلوة و توزيع حلو و كلام حلو و فيه تنويع و أفكار يديدة ما مرت علي من قبل، يعني مافي مقارنة بينه و بين البوم الفنانة "فلافل" اللي ما ينسمع كلش.

أكثر الأغاني اللي حبيتهم في الألبوم:

(1) أتفقوا الناس على هالأغنية إنها حلوة..."كل واحد" كلمات الشاعر علي الفضلي و ألحان الفيصل و توزيع زفين تركي الجنسية...الفصيل صج بدع في لحن هالاغنية...حبيت الجملة الموسيقية اللي في بداية الاغنية من (0:05) و تتكرر (4:22) و لي اخر الاغنية.
الأغنية ستايلها خليجي كلاسيكي، لحنها خرافي، و توزيعها روعة و أتمنى لو لطيفة تظل تتعاون معاه في ألبوماتها الياية...حبيت في توزيعها صوت رجالي يظهر بالخلفية بطريقة "الروبوت" و في آخر الأغنية صوت لطيفة يصير نفس الروبوت و تنتهي الأغنية بصدى نهاية الأغنية و هالشي عطاني إيحاء بأن اللي لطيفة تكلمت فيه بالأغنية إنتهى و صار مكانه فراغ ملاه الصدى...هالأغنية من كثر ما حابها ودي احطها على توسته و آكلها...والله صج ترا ما اتغشمر لووول

(2) ثاني أكثر أغنية حبيتها اهي أغنية "حلفتكم"، و هذي أغنية بإيقاع خليجي "بدّاوي" مع صوت ربابة اللي يطلع بين كل كوبليه و كوبليه...حبيت آخر مقطع (3:05) لما تقول تهجـــــروني و توقف الموسيقى و يرجع الإيقاع مرة ثانية، كنت أتمنى لو صوت الربابة شوية أعلى من جذيه بس هم حلوة الأغنية، في أغاني خليجية وايد بالفترة الأخيرة نفس ستايل هالأغنية نجحت وايد مثل "هلي لا تحرموني منه" مالت راشد الماجد و "سواها قلبي" مالت أصالة....أتوقع هالأغنية بتضرب في الأعراس.

(3)"يا أناني" أغنية توزيعها سريع و بدع فيها علي أباظه، حبيت صوت "الكسر" اللي يصير قبل لا تغني لطيفة بشوي (0:52) و في آخرها لما تقول "يا أناني" بدون موسيقى.

(4) "عينك لبرة" وايد ناس حبوا هالأغنية مو بس أنا، حبيت فيها التناغم بين صوت الساكس و تقاسيم القانون و الأوكارديون و بيانو الرومبا اللي بالخلفية، آخر الأغنية لطيفة تغير لحن الأغنية و تقول "يالله كمان" (3:52) و يبدا صوت الساكس مرة ثانية و ناس بالخلفية يقولون "هييي" ودي أتعرف عليهم أحسهم يونسون لوول

(5) "أنا من ناح و أنت من ناح" هالأغنية مادري شنو لهجتها بصراحة، لا اهي خليجية و لا تونسية و لا مصرية ولا فصحى...أتوقع بدوي شامي أو يمكن خليط من كل اللهجات العربية، تبدا بصوت غيتار روك و بعدين تقول لطيفة موال نفس صوت الغجر و تدخل طبلة تونسية و بعدين تغني لطيفة...
كلام الأغنية مثل ما قلت ماله لهجة معينة بس معناه حلو، كلمات صفوح شغاله و ألحان جورج مارديروسيان نفس الشلة اللي سوو أغنية أمانيه حق ديانا حداد من جم سنة.

(6) "صبرنا ياللي مصبرنا" الأغنية السادسة في قائمتي،الأغنية هذي إيقاعها خليجي بس آخر الأغنية لطيفة تغني فيها موال الصالحي اللي سبق و غنتها في آخر أغنية "كرهتك" و في أغاني ثانية مثل "في الغربة" التونسية و "Take me I'm yours" الإنجليزية...الموال حلو بس كررته في وايد أغاني كنت أتمنى لو في هالأغنية غنت موال "أوه يا مال" مثلاً بس هذا مو معناته إن الأغنية ما عجبتني جذيه...بالعكس حلوة بس أقصد من باب التغيير يعني.

(7) "حبينا غيره" أغنية خليجية كلاسيكية، في مقطع فيها يذكرني في تتر النهاية لأغنية "على الدنيا السلام" مالت محظوظة و مبروكة إللي غناها محمد البلوشي تحديداً مقطع "واه على الدنيا السلام"، و لاحظت إن وايد من معجبين لطيفة العرب حابين هالأغنية.

(8) "وينك تعال" كلمات بنت العطا و ستايل هالأغنية شرقي طربي على كلام خليجي.

(9) "يا ساهرين الليل"، هالأغنية كانت مفاجأة بالنسبة لي، لطيفة تغني سامري ما توقعت هالشي كلش لول

(10) "ما جيتني" أغنية كلاسيكية ثانية ثالثة بالألبوم

(11) "ما يستاهل"

(12) "وش عاد"

طبعاً الألبوم فيه 14 أغنية منهم "مملوح" و "أتحدى" بس هذول صاروا قدم بالنسبة لي عشان جذيه ما يبت طاريهم مو معناته إنهم ما عجبوني.