14 September 2008

Large Hadron Collider

مصادم الهدرونات الكبير (Large Hadron Collider و يعرف إختصاراً بإسم LHC) هو أكبر مشروع علمي بتاريخ البشرية بالحجم، سووه كمحاولة لإعادة اللي صار في الإنفجار الكبير (لحظه ولادة الكون)...و هو نتاج عمل عدة دول و مكانه صاير بين الحدود السويسرية الفرنسية.

هذا اللي الأجانب قاعدين يسونه، أما عندنا إحنا لي الحين يعلون الواحد على ما يقدر يطلع تصريح عشان يصور مكان عام و اذا قدرت تصور يبوقون صورتك باردة مبردة.

المهم، المشروع اللي مسوينه يقولون في إمكانية انه ينتج بعد تشغيله ثقب أسود ممكن يبتلع الأرض (بالعافية عليه إذا صارت) و لقيت هالصورة و قلت براويكم إياها عشان تخافون...بخخخخخخخخخخ
هالموضوع ينكتب بكل مكان في كل جرايد و مواقع الإنترنت في العالم الغير عربي في حين عندنا لا حس و لا خبر و لا كأنهم بشر من نفس الكوكب.

11 September 2008

شي يبط الجبد

- محطة الكهربا اليديدة سمعنا فيها و ما صارت لي الحين
- مدينة الحرير و جسر الصبية خلونا نحلم فيهم و ماكو شي
- مصفاة النفط الرابعة طق اعصي عليها كل يوم بالمجلس
- تغيير لوحات السيارات اليدد في الكويت توقف عشان اللوحات خلصوا و ما عندهم غيرهم
- تجديد الجوزات في الكويت ياخذ بحدود الشهر الحين و السبب ان ما عندهم مواد خام اللي يسون منها من الجوازات

في أوطى من جذيه يا ربي؟
 شي يحرق الدم...العالم كلهم ماشيين لي جدام و إحنا حتى مو واقفين مكانا و نطالع لأ، قاعدين نرجع ورا و نطالع!

الله يستر من الياي

07 September 2008

قطوة الفريج

كان عندنا قطوة بالفريج، يابت عيال و اختفت عن الساحة و عيالها كبروا و يابوا عيال و بعدين اختفوا و ظلت وحدة يابت عيال و انتوا رايحين...الغريب في الموضوع إن القطوة اللي كانت تظل كان لونها دايما نفس لون "اليدة" (الجدة بالعربي الفصيح) العودة أبيض و مبقعة بألوان ثانية.

المهم أيام الجيل ما قبل الأخير (كان هالحجي قبل جم سنة) كنت طالع برة و الا أشوف قطوة صغيرة ضعيفة حدها مادري وين أمها كسرت خاطري راح تموت كانت...ف حطيتلها حليب في "طاسة" و ما كنت تعرف تشرب منها لأنها لي الحين صغيرة و المفروض ترضع...جان اشيلها و احطها مع عيال قطوة الفريج و أهمه يرضعون...قربت منها الأم و قعدت "تشمها" جان تطقها!

شلتها منها و وديتها بعيد و قعدت أفكر "ملياً" شلون أحل هالموضوع...
القطوة الصغيرة ما تعرف تشرب من الطاسة و قطوة الفريج مو راضية ترضعها مع بناتها...
آخر شي شلت وحدة من عيالها الصغار، حطيت عليها ماي و قعدت أحكحكها في القطوة الصغيرة عشان تصير نفس ريحتها...

و بعدين رجعت و انا شايل القطوتين معاي و حطيتهم عن الأم...
قربت الأم من بنتها...شمتها..و قعدت تلحسها...
بعدين قربت من القطوة الثانية...شمتها...و قعدت تلحسها!

يعني تجربتي نجحت و صار حالي حال مندل و اينشتاين و نيوتن!

بعد فترة القطاوة و الأم صار فيهم حزازه (فطريات بشعرهم) و صلعوا كلهم من القطوة اللي لقيتها لوووووووول

04 September 2008

Youtube subtitles

Youtube recently added new feature to their service which is subtitles, it's similar to google video subtitles (shown below)...Their goal is allowing their members to reach wider audience.

قامت شركة يوتيوب مؤخراً بإضافة خدمة جديدة لموقعهم و هي إمكانية إضافة ترجمات للفيديو باللغات الأخرى، و هي خدمة شبيهة بخدمة فيديو غووغل (المبينة أدناه)...هدفهم هو جعل الأعضاء الذين يقومون برفع فيديوهاتهم الوصول إلى جمهور أكثر.

03 September 2008

غووغل كروم - الإصدار الرسمي


نزلت اليوم النسخة التجريبية من متصفح شركة غووغل الجديد تحت إسم غووغل كروم...مثل ما قلتلكم في التدوينة السابقة.
اول ما لفت نظري فيه سرعة إستجابته الغير طبيعية و اللي ما تتقارن في انترنت اكسبلورر و وحتى فايرفوكس اللي كنت انا اكتب فيه شعر (مع العلم ان فايرفوكس 3 فيه مميزات ما تخطر على بالك أحد)...

اللي يشوف واجهة إستخدام كروم، بيحس ان شاشة كمبيوتره صارت كبيرة...وايد مرتب و نظيف حتى بالغصب بتشوفون المكان اللي نكتب فيه العنوان (يسمونه اومني بوكس)...ما راح اتكلم اكثر و بخليكم تجربونه.

لتحميل نسخة من غووغل كروم زوروا الوصلة التالية:
http://www.google.com/chrome/

Official Google Blog: Google Chrome now live

02 September 2008

Official Google Blog: A fresh take on the browser

قررت شركة غووغل طرح متصفح انترنت يديد مفتوح المصدر، اسم المتصفح كروم و من المفترض ان ينزل منه النسخة التجريبية في 100 دولة يوم 2 سبتمبر 2008.

طولت غووغل على ما دشت هالمجال بس السؤال اهوه بيقدرون ينافسون فايرفوكس؟
خصوصاً ان النسخة الثالثة من فايرفوكس فيها بلاوي!

Official Google Blog: A fresh take on the browser